الأربعاء، 4 سبتمبر، 2013

مصر واعادة التاريخ وعودة الدراسة وحاجات تانية!

اهلا بكم مرة تانية يا اصحابي النهارده الاربعاء 4-09-2013 كالعاده بدات يومي بمشاهده الاخبار المصرية ولقيت ان امبارح الرئيس عدلي منصور طلع يتكلم فياتري اشمعني في الوقت ده بالذات المهم واضح ان ماراثون الرياسة هيبتدي وشكلها هتبقي ميغة كالمعتاد ولكن النتيجة محسومة رجل عسكري يمسكها والصراحة للاسف واضح ان مصر مايمسكهاش غير عسكري
المهم سيبكم من السياسة ووجع دماغها موسم الدراسة علي الابواب وطبعا اصحابنا الصغيرين بيلعنوا الدراسة ويتمنوا لو تحصل حرب او تقوم ثورة تانية بحيث انهم ياجلوا الدراسة شهر او سنه او يلغوها خالص فعلا مصائب قوما عند قوم فوائد
وامبارح كنت بتفرج علي فيلم اجنبي كالمعتاد علي mbc2 فعلا الناس دي وصلوا من التطور والرقي شيء عظيم كان فيلم طبعا خيال علمي scince fiction  يعني ! المهم ان الفيلم بيحكي عن ان البشرية بعد الف سنة مفيش حمل ولاولادة والستات طبعا هتزأطط ودكاترة النسا والتوليد هيقفلوا ويروحوا يبيعوا فجل وان الناس ( ده في الفيلم طبعا ) هتقضيها استنساخ خلية تفضل تستنسخ لالاف المرات وهكذا المهم سرحت بخاطري كالمعتاد وقلت ياه لو مصر تبلغ عشر التقدم ده المهم لما دورت القناه علي قناة ( توك توك ) ومش عارف مسمهاش ميكروباص ليه لقيت اعلان فيلم قلب الاسد ( وانا هولع فيها النهارده ) فرنت في وداني مقولة العملاق عزت العلايلي ( هي دي مصر يا عبلة ) فعلا اهلا بكم في ارض الوطن بس مبتأستش لان دورت علي قناة تانية لقيت ( سيما علي بابا ) لاحمد مكي الفنان ده محترم برغم انه غير مصري بس فعلا حاول ولو باسلوب بسيط يعمل خيال علمي ( scince fiction يعني )! بصورة كوميدية وان مصر كلها مش شحتة وكاريكا والصوت ياعم انت وهوه
وفي النهاية الي لقاء قريب وليس وداعا

ليست هناك تعليقات:

إرسال تعليق